Յուրաքանչյուր կին հղիության ժամանակ որոշակի տհաճություններ է զգում: Սակայն, նախքան դեղեր ընդունելը կարելի է փորձել արոմաթերապիա, ընդ որում, միայն բժշկի հետ խորհրդակցելուց հետո:

Առավոտյան սրտխառնոցը կանխարգելելու համար քնելուց առաջ պետք է մեկ կաթիլ անանուխի եթերայուղ լցնել թաշկինակի վրա և այն դնել բարձի կողքին: Արոմատիկ մոլեկուլները տարածվում են օդում և հանգստացնող ազդեցություն ունենում ստամոքսի  ու ամբողջ օրգանիզմի վրա: Այս միջոցն անհրաժեշտ է օգտագործել 3-4 օրվա ընթացքում և ինքնազգացողությունը կլավանա. գրում է “Dytyna.info”-ը:

Եթե հղին սրտխառնոց ունենում է նաև օրվա ընթացքում, դրան գումարվում են ախորժակի անկումն ու փսխումը, կօգնի կոճապղպեղի եթերայուղը, ինչը ցանկալի է փոքրիկ սրվակով ունենա իր հետ: Սրտխառնոցի ժամանակ հարկ է մեկ կաթիլ կաթեցնել ափին և ուժեղ շփել ափերը: Ապա ափը մոտեցնել դեմքին և մի քանի անգամ խորը ներշնչել:

Փսխման դեմ արդյունավետ են գոլորշիով ինհալացիաները: Կես լիտր տաք ջրին ավելացնել կոճապղպեղի եթերայուղի 1 կաթիլ, գլուխը ծածկել սրբիչով և շնչել արոմատիկ գոլորշին: Այդ ընթացքում աչքերը պետք է փակ պահել: Ստամոքսի շրջանի լարվածությունը հանելու համար եթերայուղային լուծույթով (1 դեսերտի գդալ բուսայուղին ավելացնել կոճապղպեղի եթերայուղի մեկ կաթիլ) թեթև շփել պորտից վեր շրջանը:

Օրվա ընթացքում արտահայտված սրտխառնոցն ու փսխումը կանխարգելելու համար այդ լուծույթով պորտից վեր շփումը պետք է անել ամեն առավոտ, և 6 օրից տհաճ զգացողությունները կանցնեն: Կոճապղպեղի եթերայուղի առավելագույն ամենօրյա չափաբաժինը  3 կաթիլ է: Եթե կոճապղպեղը հարմար չէ, կարելի է օգտագործել նույն ազդեցության այլ եթերայուղեր` անանուխ, կիտրոն, նարինջ կամ նարդոս (лаванда):